ﺍﻟﻘﻠﺐِ ﻳﺸﻮﻑ ﻗﺒّﺎﻝ ﺍﻟﻌﻴﻦ
ﻣﻦ ﻗﺒﻞِ ﺃﻗﺎﺑﻠﻚ ﺷﻔﺘﻚ ﻭﻳﻦ
ﻓﻲ ﻳﺎﺗﻮ ﻋﺮﻳﺲ ﻣﺨﻀﺮ ﺇﻳﺪﻳﻦ
ﺑﻴﻦ ﺣﻀﻨﻮ ﺣﻠﻢ ﻳﻠﺼﻒ ﻻ ﻭﻳﻦ
ﻭﺍﻟﻨﺎﺱ ﻓﻲ ﺍﻟﺪﺍﺭﺓ ﺇﺗﻨﻴﻦ ﺇﺗﻨﻴﻦ
ﻛﻞ ﺧﻄﻮﺓ ﺗﺸﻴﻠﻪ ﻋﺪﻳﻠﺔ ﻭﺯﻳﻦ
ﻗﻮﻕ ﻗﻤﺮﻳﺘﻴﻦ ﻓﻮﻕ ﻛﺮﻭﻗﺘﻴﻦ
ﻗﻴﺴﺎﺏ ﺍﻟﺸﻮﻕ ﻧﻮﺭﻳﻘﻮ ﻣﺘﻴﻦ
ﻳﺎ ﺭﺵ ﺍﻟﻐﻴﻢ ﻳﺎ ﺭﻳﺤﺔ ﺍﻟﻄﻴﻦ
ﻳﺎ ﺑﺨﺘﻲ ﺃﻧﺎ ﻭﻛﻞ ﺍﻟﺼﺎﺑﺮﻳﻦ
ﻳﺎ ﺯﻭﻝ ﻳﺎ ﺯﻳﻦ ﺃﻧﺎ ﺷﻔﺘﻚ ﻭﻳﻦ
ﻓﻲ ﻳﺎﺗﻮ ﺻﺒﺎﺡ ﺑﺎﻫﻲ ﻭﻭﺿّﺎﺡ
ﺍﻟﻄﻴﺮ ﺻﺪّﺍﺡ ﻟﻠﺰﻫﺮ ﺍﻟﻔﺎﺡ
ﺻﻔﻖ ﺍﻟﺒﺮﺳﻴﻢ ﻟﻠﻄﻞ ﻣﺮﺗﺎﺡ
ﻭﺍﻟﻨﺎﺱ ﺃﺭﻭﺍﺡ ﻓﻲ ﺣﻀﺮﺓ ﺭﺍﺡ
ﺍﻟﻌﺸﻖ ﺍﻟﺪﻏﺮﻱ ﺍﻟﻌﺬﺭﻱ ﺍﻟﺼﺎﺡ
ﻳﺎ ﻗﻮﻣﺔ ﺑﺪﺭﻱ ﻭﻓﻮﺗﺔ ﺍﻟﺪﺍﺭ
ﻣﻦ ﺃﺟﻞ ﺣﻠﻢ ﺭﺍﺟﻨﻮ ﺻﻐﺎﺭ
ﻓﻲ ﻳﺎﺗﻮ ﻣﺤﻄﺔ ﻏﺸﺎﻫﺎ ﻗﻄﺎﺭ
ﺇﻧﺪﻫﺪﻩ ﻓﻴﻬﺎ ﻭﻗﻀّﻰ ﻧﻬﺎﺭ
ﺣﺲ ﺍﻟﻌﻤﺎﻝ ﺗﺤﺖ ﺍﻷﻣﻄﺎﺭ
ﺍﻟﺮﺑﻂ ﺍﻟﺨﻂ ﻣﺎ ﻓﻚَّ ﺍﻟﺨﻂ
ﻳﺎ ﻛﻢ ﻓﻲ ﺍﻟﺨﻂ ﻫﻴﻼ ﻭﺃﻧﻔﺎﺭ
ﻭﺍﻟﻨﺎﺱ ﺍﻟﻨﺎﺭ ﺃﻡ ﻗﻠﺒﺎً ﺣﺎﺭ
ﻓﺘﺤﻮﻫﺎ ﺑﻴﻮﺗﻦ ﻟﻠﺴﻔّﺎﺭ
ﺍﻟﺰﻭﻝ ﺍﻟﻮﺍﻓﻲ ﺍﻟﻌﻮّﺍﻓﻲ
ﻳﺪِّﻳﻚ ﺍﻟﻌﺎﻓﻲ ﻣﻦ ﺍﻟﻤﺎﻓﻲ
ﻭﻣﺎ ﻳﺄﺧﺪ ﺇﻻّ ﺍﻷﺧﺒﺎﺭ
ﻻﻗﻴﺘﻚ ﺁﻫﻦ ﻻﻗﻴﺘﻚ
ﻓﻲ ﺳﺮِّﻱ ﻧﺪﻫﺘﻚ ﻭﻟﺒﻴﺘﻚ
ﻣﻊ ﺇﻧِّﻲ ﻭﻻ ﺧﺎﺑﺮ ﺇﺳﻤﻚ
ﻻ ﺍﻟﺠﻴﻬﺔ ﺍﻟﻤﻨﻬﺎ ﻻﺑﻴﺘﻚ
ﺇﻧﺖ ﺍﻹﻧﺴﺎﻥ ﺍﻟﻐﻨﻴﺘﻚ
ﺇﺗﻤﻨﻮﺍ ﺍﻟﻨﺎﺱ ﺇﺗﻤﻨﻴﺘﻚ
ﻳﺎ ﺭﻳﺘﻚ ﺗﺨﺒﺮ ﻳﺎﺭﻳﺘﻚ
ﻛﻢ ﺻﺒﺮِ ﻭﻋﺸﻢ ﺇﺳﺘﻨﻴﺘﻚ
ﻟﻮ ﻗﺒﻞِ ﺃﻗﺎﺑﻠﻚ ﻣﺎ ﺷﻔﺘﻚ
ﻣﺎ ﻛﺎﻥ ﻓﻲ ﺣﺰَّﺗﻲ ﺣﺒﻴﺘﻚ
ﺃﻧﺎ ﻭﺇﻧﺖ ﻗﺒﻞ ﺩﻩ ﺇﺗﻼﻗﻴﻨﺎ
ﺷﻘِّﻴﻨﺎ ﻋﻠﻰ ﺍﻟﺪﻧﻴﺎ ﺟﺪﺍﻭﻝ
ﺟﺒﺪﻧﺎ ﺯﻣﺎﻧﺎ ﺍﻟﻜﺎﻥ ﻋﺎﻭﻝ
ﻭﺍﻟﻌﺎﻟﻢ ﺳﻮِّﻳﻨﺎ ﺟﻨﻴﻨﺔ
ﻳﺎ ﺭﺷﺔ ﻏﻴﻤﺔ ﻋﺘﺎﻣﻴﺮﻩ
ﺭﺑّﺔ ﻋﺮﺑﺎﻥ ﻭﻃﻨﺎﺑﻴﺮﻩ
ﻗﻨﺪﻭﻝ ﺍﻟﺸﻮﻕ ﺍﻟﺤﻴﻦ ﻟﺒّﻦ
ﺟﺎﺏ ﻟﻲ ﺑﻴّﻮﺿﺔ ﻋﺼﺎﻓﻴﺮﻩ
ﻳﺎ ﺭﻳﺢ ﺍﻟﺰﻧﺞ ﺇﺫﺍ ﺍﺷﺘﺎﻗﺖ
ﺗﻔﺘِﻖ ﺑﺄﻧﻔﺎﺳﻪ ﻣﺰﺍﻣﻴﺮﻩ
ﻳﺎ ﺍﻟﻘﻤﺤﺔ ﺍﻟﺴﻤﺤﺔ ﺍﻟﻤﺪﺧﻮﺭﺓ
ﻗﺴِّﻴﺒﺘﻪ ﻗﻠﺒﻲ ﻣﻄﺎﻣﻴﺮﻩ
ﺃﻧﺎ ﺷﻔﺘﻚ ﻭﻳﻦ ؟؟
ﻗﺒﻞِ ﺃﻗﺎﺑﻠﻚ
ﺑﻴﻦ ﺩﻧﻴﺎ ﺍﻟﺮﻳﺪ ﻭﻣﻘﺎﺩﻳﺮﻩ
