فُتك يا زوله
وأنا بين الأسف واللا أسف
وغلبني أحدد وجهتي
محتار بين زوله
هي روح الحياة
وضحكتي...
زوله هي مشوارالأمل البكره
وقبلتي...
زوله يا معاي
والدنيا في كفه
وهي الرجحت كفتي...
وبين زوله سابتني ومشت
باعتني بي أبخس تمن
وأنا لسه بتحسس خطوتي
باعتني وزهدت في العشق
والحسره كان قسمتي
وأنا من حيرتي
سميتِك..الفرح القديم
وعنونتِك.. الحزن الألم
سميتِك..الوعد الحلم
وعنونتِك..إنتظار الوهم
سميتِك..للأرض السلام
وعنونتِك..الخوف الندم
سميتِك..ترياق القلم
وعنونتِك..القول السجم
سميتِك...
ولا كان عندك إسم
وأنا لسه فيني ليك باقي قول
وصمتك بفضح صرختي
يا زوله ياحزني وفرحتي
أنا بشرت الأرض بي مطرك
ينزل في كل الفصول
وزرعت في الأرض الأمل
وأنتظرتك ولانزلت في أرضي
من سُحبِك مطر
فتشتك...
في مواني الأمان
وأنا كنت برتادك هناك
لا لقيتك لا المواني
ولا البحر
صادقتك والسهر
ولحنتك بي وتر الدواخل
وغنيتك لحن الخلود
وبي ذات الوتر
لحنتك الوداع المُر
وبعدك مات الشعر
إنكسر الوتر
وأنا لا لحنتك لاغنيتك
لا أتمنيتك ترجعلي
لا أترجيتك
مع إنك كنتي البحر
وسفينة نوح
كنتي النفس الفيني
وكنتي الروح
وفتك وفيني منك باقي جروح
فتك وسويت لي حبك ضريح
وحددت أوقات المزار
وماضيك صُحبتي
فُــتك يا زوله
وأنا بين الأسف واللا أسف
غلبني أحدد وجهتي
محتار بين زوله
هي روح الحياة
وضحكتي..
زوله هي مشوارالأمل البكره
وقبلتي..
زوله معاي
والدنيا في كفه
وهي الرجحت كفتي
وبين زوله سابتني ومشت
باعتني بي أبخس تمن
وأنا لسه بتحسس خطوتي
باعتني وزهدت في العشق
والحسره كانت قسمتي
ولحنتك بي وتر الدواخل
لحن الخلود
وبي ذات الوترغنيتك
الوداع المُر
