تعــــــــالي نغني للقمـــــرة
... نشيل من نورا افراحنا نقلب السنسني الحمرة
وننسج من خيوطا امل نقابل بيه يوم بكرة
تعالي نوقف التاريخ نرجع كل سنينو وراة
عشان نتلاقي في زمننا سمح وايامو جد عطرة
زمن لا أنا لا حســـــــــرة
زمن لا آهه لا حـــــــرمان
زمن دنياه كلها خير فيه الريده منتصرة
ونرجع تانى نبقي اطفال ونبني بيوتنا في المطرة
ونمرح في حقول الروض نقطف لينا كم زهرة
نغني مع القماري نشيد أذا قوقت علي تمرة
نضوق رطب المدين قبلا ونهني اهلنا بالمسرة
نشرب من جداول الريد وحتي ولو بقت عكرة
بتروينا وتداوينا وتودر مننا الفترة
وبرضو نغني للقمرة ونلم من حولنا الشعرة
نقارن بالجمال محياك وبينا نجد بهاك سحرة
نقارن بالشفق شفتيك نجد شفتيك تزيد حمرة
بعيونك عيون الصيد نجد عينيك جميل حورة
بخدودك زهور الروض نجد خديك يفوح عطرة
نلقاك ملكه يا ملكه وجمال الدنيا محتكراة
ليكي نلم قصائد الكون وعن وصفك تكون قاصرة
حروف العربي والعجمي وكلام الكهنة والسحرة
مقامات طة والعقاد وكل النكتبو ونقرأة
لكن كلو ما يوفيك ولا جمبك يكون قطرة
نحاول تاني يا سمرة انا واشواقي والقمرة
نحاول نلقي لينا مساحه في دنياه لو مرة
نرتاح في ضفاف عينيه وتسبح في عميق بحرة
ترتاح القوافي معاه وترتاح ماجة في الحيرة
