كتبت ليك
لابيني بينك ريدة .. لا قصة غرام
اخترت ليك اجمل حروف
واصدق فواصل نادرة في لغة الكلام
لا قصدي الهوى معاك بي كلمات غناي لاشعري ليك مرجيحة من شعر الغمام
وكتبت ليك
والله ياقمر الزمان
شان جيت بي زمن المحنة
وشفت في عينيك حس اهلي القدام وكتبت ليك
وأنا جاي من زمن الشقا
المرسوم على وش الثواني مظلة تمدد الساعات سنين
تتفتح الاحزان غريبة ومذهلة
واشتاق افتش نسمة في الزمن العذاب
وايامي من كتر الاسى
وكتر العزوف والاغتراب
صبحت حروف مترهلة
لا فيها نبضة روح تموت
لا فيها سكة ذول يفوت
لحظات أسيفة ومذهلة
وكتبت ليك
ووقفت ليك لامن لقيتك
جايا من قلب الطريق
ولمحت فيك راحت المشاوير البعيدة
ولفحة النسمة الحنينة
الجايا من جوف المضيق
حسيت عجايب الدنيا اتلمت
بقت جاياني من عصرا سحيق
عينيك حس اطفال بينادوالقمر
للغايب يعود
وجبينك الضواي
حجا الحبوبة
في الزمن السعيد
وانا في قساوة الموحش
الزمن المكهرب بالحريق
انا حيلتي غيه
قولي لي ياقمر الزمان
غير اتكي واحلم معاك
وأحضن اماسي الصحوة
والامل البريق
