~أمونه ~ الجامعة~
سالوها أمنيتك شنو هي صغيره قالت منيتا الجامعة فيني الامنية ياريت أحصل قامتا*
مرت سنين لمح البصر أمونه كبرت زهرتا مضرب جمال بين الفريق قمحيه ناعمه في قمحتا*
كل الفريق في اندهاش دا الوز بقلد مشيتا بعد امتحانات البلد نجاحا كاسح شلتا*
ابوها عدمان القروش من وين يفتش نفقتا
دنقر ونقنن حبتين حبوبه باعت بقرتا والوالده قنعت من دهب والباقي كان مال خالتا*
يوم الوداع جرت الدموع ~يوم الوداع جرت الدموع في البوكسي شالت شنطتا*
كل الخلق تبكي وتنوح أمونة فاتت قريتا مهاجره في طلب العلم لازم تحقق منيتا*
فرحانة لي درب العلم عيونا عكست فرحتا*
امونة دخلت في المدن بين الخلايق وزحمتا*
مشدوها تنظر في اندهاش أمونة طالت نظرتا*
دخلت في حوش الجامعه ديك الجامعه ذادت دهشتا*
وقفت بعيد واتمحنت والكل مراقب محنتا*
كيف الولاد يا خواني هوي تشارك البنات في جلستا*
وكيف البنات تلبس هدوم كاشفا ومبينه عورتا*
ناسا تصفق بي عجب وناسا مقرقرا ضحكتا*
عاشت شهور الدهشة ديك الجفله كانت عادتا*
عرفوها من اصل القري ظهرت معالم لهجتا*
مرت شهور بعد الشهور امونه مالت للمدن لغادي جدعت طرحتا*
إختارت الهدم الرهيف شاشايه كانت لبستا*
خدعوها ترباية السجم في الفارقه ضاعت عزتا*
واصلو الهبوب لمن تهب تقلع جذور من شدتا*
واصلو المدن مافيها خير دا الخير مفارق حتتا*
أمونه يومي مع الولاد خلوها تايه في دنيتا*
ساقوها لنار الجحيم الزوله فقدت عفتا*
ابوها منتظر النجاح بحلم بنيتو وظيفتا تجيه بالخير الوفير تديه من حق صرفتا*
والام تكتر في الدعا يالله كبر رايتا* تاريها في درب السواد امونه تايه في لعبتا*
داخل الحشا نبت الجنين في الحله فاحت ريحتا*
يادوبا حست بالذنب في الضلمه صاغت فكرتا*
لازم تودع وتنتحر بالتالي تدفن عملتا*
يوم الخميس بعد الضهر في الموية كبت صبغتا*
اترددت واتذكرت كل الحصل اتشهدت في اخرو قامت شربتا*
لحقوها ودوها ألطبيب في الغرفه زنة ضجتا*
امونه هوي امونة هوي قعدت تبلع في الكلام الوحشه شوه سمعتا*
والجامعة راحت زي هبوب والقصه حسره نهايتا *
امونه رجعت للبلد العبرة حنضل بلعتا*
الناس دي مابترحم هناك بنظره شققو كبدتا*
ركبت علي البيت الكبيره وقعت كسرت رقبتا*
امونة ما أخر البنات ماها الوحيده في دنيتا*
والزوله لو نست الشرف بالجد بتفقد قيمتا*
والموية كان ضاقا الكلب في الدنيا تحرم شربتا
